Guddiga All Agents Data iyo xubno ka tirsan ururka ayaa kulan heer sare ah la yeeshay madaxda Amtel, iyagoo ka wada hadlay tabashooyinka daatooleyda, fududeynta adeegyada iyo dhismaha wada-shaqeyn joogto ah.
Maanta oo ay taariikhdu tahay 28-ka Luulyo 2026, guddi ka socday All Agents Data — Ururka Daatooleyda Soomaaliyeed — oo ay weheliyaan xubno ka tirsan ururka ayaa kulan heer sare ah la yeeshay qaar ka mid ah madaxda sare ee shirkadda Amtel.
Kulanka ayaa diiradda lagu saaray xaaladda guud ee daatooleyda Soomaaliyeed, caqabadaha ay kala kulmaan adeegyada shirkadda iyo sidii loo xoojin lahaa xiriirka ka dhexeeya Amtel iyo iibiyeyaasha adeegyada shirkadda.
Gudbinta talooyinka iyo tabashooyinka daatooleyda
Intii uu kulanku socday, guddiga All Agents Data wuxuu madaxda Amtel u soo bandhigay talooyin, tabashooyin iyo baahiyo kala duwan oo laga soo ururiyey daatooleyda Soomaaliyeed ee la shaqeeya shirkadda.
Qodobada la gudbiyey waxay la xiriireen adeegyada ay daatooleydu u baahan yihiin, caqabadaha jira iyo baahida loo qabo in daatooleyda loo abuuro hannaan fudud oo ay ku heli karaan adeegyada muhiimka u ah shaqadooda.
Madaxda shirkadda Amtel ayaa si wanaagsan u dhageystay qodobadii iyo tabashooyinkii la hor dhigay, waxayna muujiyeen faham iyo diyaar-garow ku aaddan sidii xal loogu heli lahaa arrimaha la soo bandhigay. Shirkaddu waxay sidoo kale ballanqaadday inay sida ugu dhaqsiyaha badan uga shaqeyn doonto wax ka qabashada tabashooyinka iyo caqabadaha jira.
Fududeynta adeegyada muhiimka ah
Waxaa sidoo kale kulanka lagu gaaray isfaham ku saabsan in daatooleyda Soomaaliyeed loo fududeeyo helitaanka adeegyada lagama maarmaanka u ah shaqadooda.
Madaxda Amtel ayaa oggolaaday in daatooleydu si sahlan u heli karaan adeegyada ay uga baahan yihiin shirkadda, si kor loogu qaado awooddooda iibka, tayada adeegga ay macaamiisha siiyaan iyo wada-shaqeynta kala dhexeysa shirkadda.
Soo-bandhigidda adeegyada cusub
Dhinaca kale, madaxda Amtel ayaa guddiga iyo xubnaha All Agents Data la wadaagay adeegyo, horumarin iyo waxyaabo cusub oo ay shirkaddu soo kordhisay.
Waxaa la isla gartay muhiimadda ay leedahay in daatooleyda si joogto ah loola wadaago macluumaadka ku saabsan adeegyada cusub, isbeddellada iyo fursadaha ay shirkaddu soo kordhiso.
Wada-shaqeyn joogto ah
Gabagabadii kulanka, labada dhinac waxay isku afgarteen in la dhiso wada-shaqeyn heer sare ah oo joogto ah, laguna saleeyo isfaham, wada-tashi iyo ilaalinta danaha wadajirka ah ee shirkadda, daatooleyda iyo macaamiisha.
All Agents Data wuxuu sii wadi doonaa matalaadda codka daatooleyda Soomaaliyeed, ururinta talooyinkooda iyo tabashooyinkooda, iyo la xiriirka shirkadaha isgaarsiinta si loo helo xalal wax-ku-ool ah oo horumarinaya shaqada daatooleyda.
Ururku wuxuu uga mahadcelinayaa madaxda shirkadda Amtel soo dhoweynta wanaagsan, dhageysiga tabashooyinka iyo diyaar-garowga ay muujiyeen ee ku aaddan xoojinta wada-shaqeynta labada dhinac.